ប្រែសម្រួល៖សហការី
សិង្ហបុរី៖ បុរសជនជាតិឥណ្ឌូណេស៊ីម្នាក់ត្រូវបានអាជ្ញាធរសិង្ហបុរីហាមមិនឲ្យចូលក្នុងប្រទេសរបស់គេដោយ កន្លងមកគាត់ត្រូវបានអាជ្ញាធរសិង្ហបុរីនិរទេសខ្លួនចេញពីទឹកដីសិង្ហបុរីដោយសាការលបលួចចូលប្រទេសសិង្ហបុរីខុសច្បាប់អន្តោប្រវេសន៍។
ក្រោយមកគាត់ក៏បានលួចត្រឡប់មកសិង្ហបុរីវិញដោយខុសច្បាប់ម្តងទៀតគឺគាត់បានហែលទឹកចាប់ពីប្រទេសម៉ាឡេស៊ីមកដោយប្រើថង់ប្លាស្ទិកដាក់សំរាមសម្រាប់បណ្ដែតខ្លួនហែលឆ្លងសមុទ្រទៅកាន់ប្រទេសសិង្ហបុរីដោយខុសច្បាប់ជាថ្មីម្តងទៀត។
បុរសជនជាតិឥណ្ឌូណេស៊ីឈ្មោះ Muhammad Izal អាយុ ៣៤ ឆ្នាំត្រូវបានអាជ្ញាធរសិង្ហបុរីចាប់ខ្លួនម្តងទៀតហើយត្រូវបានកាត់ទោសកាលពីថ្ងៃព្រហស្បតិ៍ ទី ២ ខែវិច្ឆិកា ឱ្យជាប់គុកចំណួន ១៥ ខែនិងត្រូវពិន័យដោយវាយនឹងថ្នាំងអំពៅចំនួន ៧ ដង។
គាត់បានសារភាពថាគាត់បានលបលួចចូលប្រទេសសិង្ហបុរីដោយគ្មានលិខិតឆ្លងដែនត្រឹមត្រូវ និងចូលមកក្នុងប្រទេសសិង្ហបុរីដោយគ្មានការអនុញ្ញាតនៅក្រោយពេលដែលគាត់ត្រូវបានអាជ្ញាធរសិង្ហបុរីនិរទេសចេញពីទឹកដីរបស់គេកាលពីខែឧសភាឆ្នាំ ២០២២។
យោងតាមឯកសារតុលាការរបស់ប្រទេសសិង្ហបុរី Izal ត្រូវបានចោទប្រកាន់ដោយតុលាការសិង្ហបុរីពីបទល្មើសអន្តោប្រវេសន៍ចំនួនបួនករណី។
គាត់ត្រូវបានចោទប្រកាន់លើកចុងក្រោយនៅក្នុងខែសីហា ឆ្នាំ ២០២១ពីបទលួចចូលប្រទេសសិង្ហបុរីដោយគ្មានលិខិតឆ្លងដែនត្រឹមត្រូវ និងពីបទលួចត្រឡប់មកសិង្ហបុរីវិញដោយខុសច្បាប់បន្ទាប់ពីគាត់ត្រូវបានអាជ្ញាធរសិង្ហបុរីនិរទេសខ្លួនចេញពីប្រទេសរបស់គេ។
គាត់ត្រូវបានតុលាការកាត់ទោសកាលពីខែកញ្ញា ឆ្នាំ ២០២១ ហើយត្រូវបានកាត់ទោសឲ្យជាប់គុកមួយឆ្នាំ និងត្រូវវាយនិងថ្នាំងអំពៅចំនួន ៦ ដង។
នៅក្រោយពេលដែល Muhammad Izal ត្រូវបានដោះលែងពីពន្ធនាគារនៅក្នុងខែមេសា ឆ្នាំ ២០២២ Izal ត្រូវបានគេបញ្ជូនខ្លួនទៅកាន់អាជ្ញាធរអន្តោប្រវេសន៍ និងត្រួតពិនិត្យ (ICA) ដើម្បីធ្វើមាតុភូមិនិវត្តន៍ត្រឡប់ទៅប្រទេសកំណើតវិញ។
នៅមុនពេល Izal ត្រូវបាននិរទេសក្នុងថ្ងៃទី ២៨ ខែឧសភា ឆ្នាំ ២០២២ គាត់ត្រូវបានអាជ្ញាធរជូនដំណឹងជាលាយលក្ខណ៍អក្សរមួយច្បាប់ដោយប្រាប់គាត់ថាគាត់ត្រូវបានហាមឃាត់មិនឱ្យត្រឡប់ចូលទឹកដីរបស់ប្រទេសសិង្ហបុរីវិញទេហើយលិខិតជូនដំណឹងនេះមានប្រសិទ្ធភាពចាប់ពីថ្ងៃនិរទេសគាត់ចេញពីទឹកដីរបស់ប្រទេសសិង្ហបុរី។លិខិតជូនដំណឹងនោះមានបញ្ជាក់ថាមុននឹងធ្វើដំណើរមកកាន់ប្រទេសសិង្ហបុរីវិញគាត់ត្រូវស្នើសុំការអនុញ្ញាតជាលាយលក្ខណ៍អក្សរជាមុនពីអាជ្ញាធរអន្តោប្រវេសន៍របស់ប្រទេសសិង្ហបុរីដើម្បីទទួលបានសិទ្ធិចូល ឬរស់នៅក្នុងប្រទេសសិង្ហបុរីនាថ្ងៃអនាគត។
Muhammad Izal ក៏ត្រូវបានគេជូនដំណឹងផងដែរថាការអនុវត្តផ្ទុយនឹងសេចក្តីជូនដំណឹងនេះនឹងត្រុវចាត់ទុកជាអំពើល្មើសច្បា់ដែលនាំឱ្យមានការចាប់ខ្លួនជាថ្មីនិងកាត់ទោសឲ្យជាប់ពន្ធនាគារពីមួយឆ្នាំទៅបីឆ្នាំដោយយោងទៅតាមស្ថានទម្ងន់ទោសជាក់ស្តែង។
Izal បានទទួលស្គាល់ការជូនដំណឹងនេះហើយបានផ្តិតមេដៃទុកជាសក្ខីកម្មបន្ទាប់មកគាត់ត្រូវបានអាជ្ញាធររបស់ប្រទេសសិង្ហបុរីនិរទេសត្រឡប់ទៅកាន់ប្រទេសឥណ្ឌូនេស៊ីវិញនៅថ្ងៃទី ២៨ ខែឧសភា ឆ្នាំ ២០២២។
ក្រោយពីបានស្នាក់នៅប្រទេសកំណើតរបស់ខ្លួនបានប្រាំពីរខែ Izal ក៏សម្រេចចិត្តវិលត្រឡប់មកប្រទេសសិង្ហបុរីវិញដើម្បីស្វែងរកការងារធ្វើដោយខុសច្បាប់។
គាត់បានជិះកាណូតពី Batam ចេញពីប្រទេសឥណ្ឌូនេស៊ីទៅកាន់ Stulang Laut នៃតំបន់ Johor Bahru ក្នុងប្រទេសម៉ាឡេស៊ី។
Muhammad Izal បានចំណាយពេលពីរយប់នៅទីនោះនៅមុនពេលចាកចេញទៅកាន់ឆ្នេរសមុទ្រមួយកន្លែងហើយក៏សម្រេចចិត្តហែលឆ្លងសមុទ្រទៅកាន់កោះ Pulau Ubin ដែលជាទឹកដីរបស់ប្រទេសសិង្ហបុរី។
យោងតាមឯកសារតុលាការរបស់ប្រទេសសិង្ហបុរីបានបង្ហាញថា Izal បានប្រើថង់ប្លាស្ទិកដាក់សំរាមពណ៌ខ្មៅសម្រាប់បណ្តែតខ្លួនតាមទឹក។
នៅក្រោយពេលទៅដល់កោះ Pulau Ubin Izal ដែលជាទឹកដីរបស់ប្រទេសសិង្ហបុរីIzal បានសម្រាកកន្លះម៉ោងមុនបន្តហែលទឹកឆ្ពោះទៅកាន់ឆ្នេរ Changi ។
Izal បានចូលទៅក្នុងប្រទេសសិង្ហបុរីដោយមិនដឹងខ្លួនដោយខុសនឹងច្បាប់អន្តោប្រវេសន៍នៅក្នុងប្រទេសសិង្ហបុរីគាត់បានស្នាក់នៅដោយខុសច្បាប់អស់រយៈពេលប្រហែល ១០ ខែ រហូតដល់ថ្ងៃទី ២៣ ខែតុលាឆ្នាំនេះ Muhammad Izal ត្រូវបានចាប់ខ្លួនដោយភ្នាក់ងា ICA ប្រចាំតំបន់ Woodlands Road ក្នុងខណៈពេលដែលគាត់មិនអាចបង្ហាញលិខិតឆ្លងដែនស្របច្បាប់សម្រាប់បញ្ជាក់ពីភាពស្របច្បាប់ក្នុងការស្នាក់នៅក្នុងប្រទេសសិង្ហបុរី។
Muhammad Izal ត្រូវបានបញ្ជូនខ្លួនទៅកាន់សាខាការិយាល័ភ្នាក់ងាស៊ើបអង្កេតរបស់ ICA ហើយត្រូវបានពិតនិត្យស្នាមម្រាមដៃដើម្បីពិនិត្យមើលទៅលើប្រវត្តិរបស់បុគ្គលដែលមាន “កំណត់ត្រាមិនល្អ” ក្រោមឈ្មោះ Muhammad Izal ដែលជាឈ្មោះរបស់គាត់ ។
ដើម្បីជាមធ្យោបាយឲ្យមានការអាណិតអាសូរក្នុងការបន្ធូរបន្ថយទោសគាត់ក៏បាននិយាយថា គាត់ទទួលស្គាល់កំហុសរបស់គាត់ហើយគាត់មានការសោកស្តាយយ៉ាងខ្លាំងចំពោះការប្រព្រឹតផ្ទុយនឹងច្បាប់របស់ប្រទេសសិង្ហបុរីក៏ប៉ុន្តែដោយសារតែគាត់មានកូន និងឪពុកម្តាយមានជំងឺដែលជាមូលហេតុបង្ខំឲ្យគាត់ឆ្លងដែនមករកកាងារធ្វើដោយខុសច្បាប់៕
ប្រភព៖ CNA